الاثنين، 16 مارس، 2009

الصــح والغـلط .. والبقــاء للأقــوى


لو فكــرنا في أي مشكلة بين أي عــدد من الأطراف في الدنيــا بغض النـظر عن تفاصيل المشكلة هنلاقي ليها سـبب واحد، والسبب ده يعـتبر نظرية نمرة واحد في كلامنا هـنا وهي "نظــرية الصــح والغلــط" الحكاية دي هي السبب في أي مشكلة، لأن النــاس بتخـتلف على ... إيـه هو الصـح ... وإيه هو الغلـط؟؟

فالصح بتاعي غير الصح بتاعك والغلـط شـرحه، وتلاقي كل طـرف بيحاول يثبت إن رأيـه أو طـريقــته هي الصح ويسـتدل بالكـتب أو الأديــان أو الأبحــاث العلمية أو الأغلبيــة في النهايــة لو إحـتار.

تشـوفوا الراجـل ومـراته بينــهم مشــكلة على أي حاجة كل واحد يقــعد يرغي ويزعق ويتخانق علشان يثبت إن هو اللي صح وإن التاني لازم يسمع كلامه ... حتى بين الجـار وجـاره وكمان على مسـتوى البلاد مع بعضها، ولو فــكرتم في أي قانون أو تصـرف كــبير أو صـغير هتلاقوا لازم يكــون عليه إختــلافات في الآراء ولما نزلت الأديــان كان من المفترض إن العملية تتنظم لكن حتى الأديان بقى فيها إختلافات.


الغلط ممكن يبقى صح تحت شروط وظروف معينة والصح ممكن يبقى غلط في ثقافت مختلفة وتحت شــروط معينة برضه، طــبعاً نظــريتي دي أكــيد ليها معارضين لأنها تقــع تحت نفسها، بس أنا باحاول أثبتها زي كل البشــر.


هناخد خطأ كبير الإختلاف عليه قليل علشان القياس بالأخطـاء الصغيرة يبقى أسهل. القـــتل مثلاً... أظن القــتل حاجة غلط .. وغلط كــبير .. لكن هل القــتل بالنسبة للجندي أثناء الحرب غلط؟؟ ... بلاش دي .. هل القتل بالنسبة لعشماوي اللي بيقتل كل يوم والتاني ناس مالوش أي علاقة بيــهم ولا في بيــنه وبينـهم أي عداوة وبياكل عيش من الحــكاية دي .. غلــط؟؟ يبقى مفيش صـح مطـلق ولا غلـط مطــلق.

-----


طيب ما كل واحد يعمل اللي هو عاوزه ..!! طبعاً ممكن .. ومش هيحصل مشكلة لو كل واحد عمل اللي هو عاوزه بعيد عن التاني يعني من غير ما يكون اللي هو عاوزه ده يمس الطرف التاني.

المشكلة بتحصل لما اللي هو عــاوزه يأثر بالسلب على غيره، وممكن المشكلة تتحل ببساطة ســاعتها، يعني لو محمد عمل حاجة ضايقت إلهام، وإلهــام قالت وعبرت عن إن الحاجة دي ضـايقتها ممكن محــمد يشــتري خاطر إلهــام وميعملش الحاجة دي، لأنه كــده فــهم إن الصـح بتـاعه غــلط عند إلهــام، وبكده تتحل المشكلة بكل بسـاطة .. يعني غلطك مش صحي أو غلطي مش صحك..

خلاص ولا تزعل لو صحي بيضايقك مش هاعمله تاني وكل واحــد مهتم بشخصي أو بشيء يتعامل معاه كده .. لكن هل هو ده اللي بيحصل..؟؟

اللي بيحصل إن لما محــمد بيعمل حاجة تضايق إلهــام وهي تعبر عن ضيقها بتظهر النظــرية نمــرة إتنيــن وهي "نظـرية البقـاء للأقـوى أو للأصـلح" بيـبدأ كل طرف يتمسـك بفكرته وبطريقـته ويجيب الـبراهين والدلائــل من الإعــلام والـنت والفـتاوى ومن أصحابه .. ولو مفيش حاجة نفعت يقول : أنـــا كــده.

والغريبة إن الطـرف التـاني ممكن يجـيب نفـس الـبراهين لكن بقدرة قادر تلاقي البراهين دي بتثبت فكـرته هـو وطـريقته .. وحتى ممكن نفس الشهود اللي شافوا إن الطرف الأولاني صح يشوفوا إن الطرف التاني صح برضه، والدنيا تولع وتكبر المشـكلة وتتفرع واللي نفسه أطول بقى هو اللي يكسب أو صاحب الإحتياج يتراجع أو في بعض المشاكل الأقوى أو صاحب السلطة هو اللي كلامه يمشي ...


زي الواد مجانص لما قــابل ابن عمه عبــاس .. مجانص: إزيك يا عبـاس .. فين أراضيك يابن عمي .. بتعمل إيه دلوقتي في حياتك؟؟ عبــاس: الحمد لله إزيك إنت .. أنا اتجوزت وخلفت وفاتح ورشة بيع وتأجير وتصليح عــجل باكل منها عــيش ... إبقى تعــالى زورني.


وبعد كام يوم نــط مجانص لعبــاس في ورشــته علشــان يزوره.


مجانص: ياسلام .. والله براوه عليك ياد يا عبــاس دي الورشة عال قوي .. وإيه العجل الحــلو ده؟؟.. كل ده ملكك يابن عمي؟؟ والله عــفارم عليك.

عبــاس: ربنا بيســهلها للواحد طالما الواحد طالب الســتر بالحلال.

مجانص: اللــه .. العجــلة دي عـجباني قــوي يا عبــاس أنا عاوزها أروح بيها مشوار وأرجعها لك.

عباس: متغلاش عليك يابن عمي.. الورشة ورشتك وإحنا أهــل.


أخــد مجانص العجلة ومرجعهاش غير بعــد يومين، واليوم اللي بعــده راح أخد عجلة تانية ورجعها بعد إسـبوع .. واليوم اللي بعده راح مجانص وزمايله في الݘــيم أخــدوا كــذا عجــلة ورجعوهم بعد إســبوعين واليوم اللي بعده.... عبــاس قال دي مش طريقة دي .. إشــتكى لكل الناس وحـاول يتكلم مع مجانص بس مجانص مفيش معاه تفــاهم .. عمل قعده فيها مجموعة من المصلحين.

عبــاس: يرضيكم يا جماعة تجارتي اللي بتــأكلني عــيش ييــجي إبن عمي كل يوم والتاني داخل طالع هو أصحابه مســتوليين على العــجل بتاع الشغل وأنا عندي كوم لحم في رقابتي؟؟؟

قــام مجانص وهو مكــشر وقــال: بقى يعــني هي دي القــرابة؟؟ في إبــن عم يقول لإبــن عمــه (مســتوليين) هو إيــه اللي حصل في الدنيا يا جــدعان حد يرضيه الكلام ده ...؟؟؟ إنت جايب الناس تهــزأني قــدامهم ؟؟

المصلحين بيحــالوا يهدوا الموضوع ... شــوية يقــولوا لمجانص مينفعش كده إنت غلطــان.. وشوية يقولوا لعباس إنت غلط فيه .. وتنفض القــعدة وكله يروح بيتـه والناس ترغي وتتحاكى والمشكلة ماتحلتش.

واليــوم اللي بعـده .. يخــش مجــانص ورشة عباس ويبات فيها أصله مدفعش الإيجـار وإطـرد من شـقته (هي دي حجــته) ومش ممكن يعني إبن عمــي يسبني أنــام في الشــارع، ويوم ورا اللي بعــده ييجــوا أصحاب مجانص يباتوا معاه والعجل والورشــة بقوا تحت أمر مجـانص وشــلته.

عبــاس راح إشــتكى وعمــلوا قعــدة تاني للصلح .. آخرتها كانت إن الورشة إتقسـمت نصين، نص لعــباس وعــيلته ونص لمجانص وأصحابه، ولاد عباس نازلين شتيمة في مجانص وأصحابه يمكن يمشوا ... ومجانص وأصحابه عـــينك ما تشــوف إلا النــور ضــرب .. ضــــرب .. مفيــش شــتيمه أبــداً.

ولما يتعبوا هما أو الناس اللي حواليهم يعملوا قعدة للصلح ودايماً مجانص عنده حجته ومؤيــدينه وعبـــاس كــمان ودي "نظــرية الصــح والغلــط". ومش بتخلــص على كــده ... لأ ده مجانص من قوتــه وســلطته مـش مكــفيه نص الورشـــة ... شـــكلكم كده عارفين بقــية الحــكاية .. ودي بقى "نظــرية البقاء للأقــوى أو الأصلح".

هناك 7 تعليقات:

GHARAM يقول...

فعلا مسألة معاييرالصح والخطأ تخضع للموروث الثقافي والبيئة المحيطة، فمثلا نحن عندنا أكبر عيب أن يتجشا الشخص بصوت مرتفع في وجه الآخرين أو حتى يسمعوه، لكن هذا الأمر ليس عيبا بالمرة عن الهنود والفلبنيين،فمثلا الشعب اللبناني يستخدمون الفاظا نحن نسب ونشتم نحن بها ،وهي عندهم عادية لا يستنكرون قولها،وهكذا


وأؤيدك في الرأي أنه لايوجد صح مطلق أو خطأ مطلق

والمشكلةالحقيقية تكمن في أن كل واحد منا يريد أن يقنع الآخر رغم أنفه بنظريته الخاصة في الموضوع الصح والخطأ


تحياتي

*SosSoOo* l'o'l يقول...

أشكرك غـــرام
فعلا في عادات كتير مختلفة عند شعوب كتير ... يعني مثلا عندنا زمان كانوا بيقولوا محدش يكنس بالمقشة بالليل علشان ده بيجيب الفقر في البيت... واكيد يعني في شعوب تانيين كتير بيكنسوا بالليل عادي

والفقر لابد لابد ولا ليه دعوة بمقشة ولا غيره

شرفتيني

أسوور يقول...

اهنئك على الإسقاط على الإحداث الجارية فى الساحة الدولية

المشكلة الفلسطينية-الإسرائيلية

لما حد ييجى يعمل غلبان وتساعده .. وبعدين تبص تلاقيه برشط عليك حبة حبة


لحد ما تبقى انت واللى تملكه ملك للشخص دة بالإكراه

ولما تحاول تسترد اللى اخده يبقى خلاص سيطر واتفرعن

وقالوا لفرعون مين فرعنك .. قال .. ملقتش حد يلمنى

الحكاية دى بتفكرنى باخواننا البعدا فى اسرائيل .. اهم عملوا زى اللى عمله مجانص بالظبط

Beram ElMasry يقول...

السلام عليكم ورحمة الله وبركاته
عزيزتى الغالية ،انت ام اليوم او غدا ، فكل عام وانت بخير فى عيد الام ، وان كنت تتمنين لطفلك ان يحيا امنا فلقنيه ان الاسرائيلى شر كله ، فلا يامنه برهة ، ولا يسالمه مدى الحياة

يهودى يعنى حنش احسن دوا تقطعوا راسه
كلام نقوله لنسلنا نطبعوا فى كتابه وكراسه
لك تحياتى والسلام عليكم ، ولا سلام مع اليهود
بيرم المصرى

*SosSoOo* l'o'l يقول...

عزيزتي اسر اشكرك على اهتمامك واتمني ان تحل القضية الفلسطينية ويعيش العرب في سلام .

كما أؤيد الاستاذ بيرم المصري فالاسرائيلي لعنة
وشكرا على التهنئة بعيد الام.

Hesham يقول...

الله عليكى وعلى قصتك بجد المسألة انى لم انظر الى القصه على انها قصه صح وغلط ومعايير مختله ومختلفه ومتغيره دوما ولكنى نظرت لقصتك وكأنها تكرس للتاريخ العربى الحديث مع اسرائيل صدقينى ان نظرت الى قصتك ستجدين تأريخا واسقاطا جميلا للوضع العربى الإسرائيلى ( مش هم بيدعوا انهم ولاد عمنا ) من بداية دخلوهم فلسطين على انهم لايجدون المأوى الى اجتماع القمم العربية والتشاجر والإجتماعات والكامبات سواء ديفيد او غيره وتنفض الإجتماعات عن لاشئ ومازال مجانص اقصد اسرائيل تحتل اراضى عربيه مثل نصف المحل بتاع مجانص ومازال المجتمعون على حالهم لاحل
صدقينى تحمست جدا لقصتك واتمنى ان تنشريها فى مجلة او جريده

*SosSoOo* l'o'l يقول...

شكرا لحماسك يا هشام

وانت فعلا وصلت للمعنى اللي انا اقصد اطرحه في الموضوع
مع اضافة ان اللي بيحصل على المستوى الدولي بيحصل حتى في اتفه المشاكل بين اي طرفين

وان اي مشكلة بين طرفين لن يحلها غير هذين الطرفين - مع شرط ان يرغب الطرفين في الحل- يعني لو طرف واحد عاوز يحل ... يبقى مفيش فايدة

وان اي جهود في هذه الحالة من اي اطراف لا يتعدى التمثيل وأداء الواجب